തമിഴ് നടൻ ഡാനിയൽ ബാലാജി അന്തരിച്ചു
ചെന്നൈ : മലയാളികൾക്കിടയിൽ സുപരിചിതനായ തമിഴ് നടൻ ഡാനിയൽ ബാലാജി അന്തരിച്ചു .48 വയസായിരുന്നു.നെഞ്ചുവേദനയെ തുടർന്ന് ചെന്നൈയിലെ കൊട്ടിവാകത്തെ ആശുപത്രിയിൽ പ്രവേശിപ്പിച്ചുവെങ്കിലും ജീവൻ രക്ഷിക്കാനായില്ല മൃതദേഹം ശനിയാഴ്‌ച പുരസൈവാക്കത്തെ വസതിയിൽ പൊതുദർശനത്തിന് വെക്കും.
1975ൽ ജനിച്ച ടി.സി ബാലാജി ടെലിവിഷനിലാണ് തൻ്റെ കരിയർ ആരംഭിക്കുന്നത്. ചിത്തി സീരിയലിലെ ഡാനിയേലായുള്ള ആദ്യ പ്രകടനം തന്നെ അദ്ദേഹത്തിന് വ്യാപകമായ അംഗീകാരം നേടിക്കൊടുത്തു .വേട്ടയാട് വിളയാട് (2006) എന്ന ചിത്രത്തിലെ അമുദൻ, വട ചെന്നൈ (2018) യിലെ തമ്പി, മായവൻ (2017) ചിത്രത്തിലെ കഥാപാത്രം എന്നീ പ്രകടനങ്ങളിലൂടെ വലിയ ആരാധകവൃന്ദത്തെ സ്വന്തമാക്കിയ അഭിനേതാവായിരുന്നു ഡാനിയൽ ബാലാജി .
തമിഴ്, മലയാളം, തെലുങ്ക്, കന്നട ചലച്ചിത്രങ്ങളിലെ ശ്രദ്ധേയനായ വില്ലനാകുന്നതിന് മുമ്പ് അദ്ദേഹം കമൽഹാസന്റെ റിലീസ് ചെയ്യാത്ത ചിത്രമായ മരുതനായകത്തിൽ യൂണിറ്റ് പ്രൊഡക്ഷൻ മാനേജറായിട്ടാണ് സിനിമാ രംഗത്തേക്ക് കടന്നുവരുന്നത്.
ബ്ലാക്ക് എന്ന ചിത്രത്തിലാണ് മലയാള സിനിമയിൽ ആദ്യമായി അഭിനയിച്ചത്. പിന്നീട് മോഹൻലാൽ നായകനായ ഭഗവാൻ, മമ്മൂട്ടി നായകനായ ഡാഡി കൂൾ എന്നീ ചിത്രങ്ങളിലും അഭിനയിച്ചു.
